گروه‌های کاری
گروه‌های کاری کمیتهٔ صلح افغانستان
کمیتهٔ صلح افغانستان بر بنای اصل «همکاری و سهم‌گیری مستقیم اعضا در امور و تصامیم» تشکیل شده است. راهبردهای درازمدت و اجراآت و برنامه‌های روزانه و سالانهٔ کمیته در حقیقت مولود پیشنهادات، سهم‌گیری مستقیم، کار عملی، کمک‌های مالی، و تصامیمی اند که توسط اعضای کمیته پیشنهاد شده و در عمل پیاده می‌شوند. به منظور تطبیق اصل سهم‌گیری مستقیم اعضا در امور، اعضای دایمی و افتخاری کمیته (و اشخاص مسلکی خارج از کمیته) در چهارچوب گروه‌های کاری تخصصی توسط هیئت مدیرهٔ کمیته منتصب شده و به امور محولهٔ گروپ کاری مربوطهٔ خود رسیدگی می‌کنند. هر یک از گروه‌های کاری کمیتهٔ صلح توسط رئیس گروه و معاون او اداره می‌شود. اعضای کمیتهٔ صلح می‌توانند از طریق عضویت و کار عملی افتخاری (بدون دریافت حق الزحمه) در چهارچوب این گروه‌های کاری در امر پیشبرد و بهبود امور کمیته سهم گرفته و به غنی سازی محتوای ویب سایت، توسعهٔ روابط شبکه یی (networking)، تدویر مجالس، و تطبیق سایر برنامه‌های کمیته کمک نمایند. انتظار می‌رود همه اعضای دایمی کمیته عضویت یکی از گروه‌های کاری کمیته را کسب نموده و عملاً در امر پیشبرد وظایف آن کمک نمایند. هر عضو می‌تواند در بیشتر از یک گروه کاری عضویت داشته باشد. اعضایی که بنا بر مصروفیت‌های کاری و سایر دلایل موجه قادر به شرکت عملی در گروه‌های کاری کمیته نیستند می‌توانند از طریق پرداخت اعانه و تقویت بنیهٔ مالی کمیته سهم خود را در این زمینه ایفا نمایند.
اساسنامهٔ کمیتهٔ صلح تشکیل گروه‌های کاری ذیل را پیش بینی نموده است:
1. کمیتهٔ روابط خارجی (تماس ها و مذاکرات صلح)
2. کمیتهٔ دفاع از حقوق بشر (منجمله حقوق زنان، دختران، و کودکان)
3. کمیتهٔ جلب منابع مالی و اعانه ها
4. کمیتهٔ مطالعه، پلانگذاری، و تحقق امور بازسازی در افغانستان
5. کمیتهٔ امور نشرات، تعلیم و تربیه، تبلیغات صلح، و مطبوعات/فرهنگ/تاریخ
هر یک از این گروه کاری دارای دستورالعمل ویژهٔ خود بوده و امور محولهٔ خود را در همکاری و تحت نظارت هیأت مدیرهٔ کمیتهٔ صلح به پیش می‌برند.